曾智華 - 瘋狂斬殺吸血鬼|祿祿無窮

影視串流平台競爭,可以用兩個字形容——慘烈。作為消費者,大樂!因幾十蚊個月可以全家幾部電視分開睇。個個影視網都是一個大森林,一世睇唔完。

慘烈的後果,當然鬥燒錢。所以,呢類公司股票,咪買!

要競爭,除買片外,就是要有獨家製作。例如Netflix,不停用天價拍片。大手筆的,可以用上十幾億(港元)。不過,太多外判,質素無保證,不時做咗水魚。

剛剛睇完一套,今次冇被撳鵪鶉嘞,正是《打工獵人》(Day Shift。非常重手,請到奧斯卡影帝,格林美音樂大獎得主,五十四歲的全才藝人占美霍士Jamie Foxx)擔綱演出。佢肯做,套戲已經是質素保證。

事實,此片一開場已似磁石,將你的神經系統緊緊吸住。因有一場超過五分鐘的攞命搏鬥,正是占美霍士大開殺戒,又長槍又手槍又開山刀,將幾隻吸血鬼殺個片甲不留。

片中的吸血鬼,隻隻中槍冇事,又再同你死過,直至個頭被斬斷。你話嘞,一套瘋狂斬殺吸血鬼電影,會幾咁超級核突殘忍?

幸而,包裝上,導演以幽默手法進行,減低血腥感。占美角色,乃一個表面為清潔泳池工作的吸血鬼殺手,爽勁過癮。

此片導演佩里(J.J. Perry),特技人及武術指導出身,設計連場殺戮,大開眼界,正!
曾智華
更多文章