任睇No.1
  • 26º
  • 94%
  • 2022年10月7日 星期五

曾智華 - 夾正時辰,砌到你暈|祿祿無窮

政治行為,一講奪權,就會非常之狠。小至普通議會選舉,大至總統選舉,再大至國與國之間爭霸,完全冇和平友善想像空間,因「唔係你死就是我亡」!

過去幾屆特首選舉,永遠就在最重要時刻,爆出你估都估唔到的醜聞。全部「炸彈」早早放倉庫,只等最精準時候引爆。

當中,唐英年墮馬為最經典例子。

美國選總統,更冷酷無情。掌權的一方,必用盡手上彈藥,將目標人物炸過稀巴爛。

你唔使同情特朗普,若佢有權,一樣咁做。當年希拉莉同佢鍊,明明暗暗的陰招,層出不窮,單單「電郵門」放料,已咬到希姐遍體鱗傷。結果,剛剛輸個馬鼻。

今番FBI對「狂特」抄家,真係唔使陰謀論,都知係瞄準佢開始搞局。民主黨部署下屆選舉,先「敵人」於十一月中期選舉前盡情discredit,一於搞到佢成身蟻,官司纏身,名譽掃地。

會否成功?走着瞧!不過「狂特」鬥心及反彈力非比尋常,兼且心狠手辣,你做初一,佢必做「超級十五」。美國內鬥,非常血腥,外人只可剝花生睇「暴力猛片」。

牌面睇,特朗普的確有「偷走」機密文件,連佢的律師團也確認文件已交還政府。咁,拜登政府重唔死咬住你?呢套劇,可以日日追,直至十一月。劇情必定不會平庸,出人意表橋段,勢將日日爆出!
曾智華

hd