任睇No.1
  • 28º
  • 79%
  • 2022年10月7日 星期五

曾智華 - 《山旮旯》好鬼好睇|祿祿無窮

雖然我是影迷,但並非套套入場,尤其睇見個名時冇乜feel的,就放棄。

例如,半個月前上畫的《緣路山旮旯》,都唔知佢乜頭乜路。再睇睇個演員表,亦未能夠吸引我專誠到戲院的卡士,自然,冇理。

不過,奇!此片真係有口碑,一個又一個同我講:「碌Sir,睇吓啦,好開心㗎 !」

終於,前晚食飯,連家中「肥女B」都推介:「肥爸,你又話自己係超級影迷,呢套港產片,冇理由唔睇噃,起碼捧有心有火有誠意年輕人場喎!」

好,既然咁多推介,肯定掂,一於睇!不過……原來不少戲院已經冇上。終於搵到荷里活,亦一日只做一場,冇得揀時間嘞,上午十一點半。

起初,諗住片商觸覺咁敏銳,冇死錯人嘅,一日只排一場,應該拍烏蠅嘞。

點知……埋去買飛,一睇座位表,吓?滿咗三分之二,有冇咁誇張。

推門入戲院,果然!望望上座的,並非學生哥,起碼大半為二十到四十五成年男女。

片長九十五分鐘,但由第一分鐘,已吸住所有人,絕大部份時間個個會心微笑,也不停聽到嘻哈大笑。

感謝大家的口碑,令我冇走雞。

全片香港味、幽默感,青春力……逼人。傻兮兮的岑珈其發達,戲內遇上五位女神,尤其與蘇麗珊及余香凝兩段情,甜到入心。

睇完發覺,原來我竟然仍有點點少男情懷,哈!
曾智華

hd