任睇No.1
  • 28º
  • 79%
  • 2022年10月7日 星期五

曾智華 - 通脹絕對非必然|祿祿無窮

經常聽到人呻,乜都貴晒!究竟係真唔係真?真咗大半,但也有不少商品,不但冇貴到,反而平咗。

簡單,你近日買二手樓就知,不但平過早幾年,兼且,個價任你鋤,夠膽還分分鐘比三年前平兩成!

又例如報紙。《頭條日報》根本免費任睇,實體及網上皆如是,斗零都冇收你。

就算《星島日報》,話你知,我買幾錢吖——七蚊雞!因為土瓜灣平一蚊,另外,在本報又或上網download coupon,又平兩蚊。

幾百人搞張報紙,日日幾十擔心血,一個齋包咁價錢已經買到,歎足兩小時,真係唔知乜嘢世界,點解可以平成咁?

另外,小弟朝朝T恤短褲,早餐完晨運,回家沖涼再換另一件。正常日子,一日穿兩件,夏天換多次,三件。故此, T恤消耗量,非常勁。粗着,當然唔會買運動名牌Nike或Lululemon。最好買連鎖集團月下貨。

小弟呢類阿叔,但求夠闊夠舒服、嗦汗,設計有冇型、圖案如何,一律冇研究之至。

一到八月,間間大減價,我則鎖定U記,因質料較好,而且……真係講都唔信,過去十年,根本好似通脹與呢個集團無關。總之,一到八月就跳樓價——三十九蚊雞一件。

騎騎,此時,我一買,不是一兩件,而是一打,十二件!四百蚊有找!邊有通脹呀?
曾智華

hd