曾智華 - 「一成特首」 |祿祿無窮

近日,可能有個人,非常風騷又心涼,前特首林鄭月娥是也。

點解?香港人,經歷過林鄭五年管治,對佢為人、作風、性格,個個了然於胸啦。

記得在二○一九年至二○二一年之間,佢最谷鬼氣的事(之一),為經常有人攞佢同澳門特首賀一誠比較。間中又俾京官窒,暗指:「你睇賀一誠做得幾好?立法會早早完善,國安法順利通過,又冇社會不安,更冇暴動。疫情也控制得非常理想,絕冇爆發……」

心高氣傲如林鄭,搞到要同埠仔特首比,仲要將佢踩低,條氣點順?尤其,香港醫學會會長蔡堅,更「口不擇言」,前年一次記者會,被問及點解香港疫情方面處理得咁差,不及澳門時,佢諗都唔諗窒過去:「因為特首唔同!」

嘩,呢句立即街知巷聞,林鄭啖氣,點吞得下?

不過,劇情繼續發展,只得「單一工業」——開賭的澳門,因疫情冇得通關,也冇得對外開放,要緊跟「動態清零」,結果,全面陰乾!

澳門冇遊客、冇賭客,食乜?日日幻想「明天會更好」?等等吓,三年過去,個個官坐困愁城,市民當然嬲到爆,將怒火發向政府,尤其針對賀一誠。如今,澳門人最興的口頭禪:「一成特首管治下,生意變一成、荷包得一成……」

最慘唔知幾時才天光。若你係林鄭,見到賀一誠「搞成咁」,心態又會如何?
曾智華
更多文章