曾智華 - 唔着泳衣着大褸?|祿祿無窮

每個早上,小弟最享受邊歎奶茶邊歎實體報紙,一歎,就是兩個小時,吸收無盡資訊,化作寫稿題材。

通常,會先快瞄新聞版,睇睇有冇震撼性報道。若冇,立即揭去娛樂版。

係呀,我先睇娛樂版㗎!點解?因唔使用腦。

前兩日,張張娛樂版都大大段報道開電視《Summer Girls》,十四位性感女郎,有咁少着咁少見記者,為吸鏡頭,個個搔首弄姿搏盡。

搞娛樂,高手宣傳一定預先放料,分分鐘與記者打籠通扯貓尾,以製造話題。

呢個記招,好笑在記者問是否為撼港姐而搞,擺明係,奇在監製又否認。

計小弟話,最佳答法,應該:「係呀,明刀明槍撼港姐呀,否則,使乜搞咁大壇性感騷?到時睇吓邊邊更高收視啦!」

如此,就會掀起一場牙骹戰,搶盡Focus,達至Win Win效果。

記者會中,最富娛樂性為有記者問低B問題:「監製,你叫佢哋着咁性感泳衣上陣,被批評販賣色情喎?」

監製笑笑口答:「去海灘做節目,着泳衣有幾出奇?」

俾我肥碌答,會話:「記者妹妹,你有冇去過海灘游水?有冇着泳衣?又或,着長大褸落水?着泳衣販賣色情,咁夏天咪日日十萬計人在海灘販賣色情?當中,可能好多係你親戚朋友噃。好啦,下次搞《Winter Girls》時,着密實啲啦!
曾智華

hd