任睇No.1
  • 28º
  • 79%
  • 2022年10月7日 星期五

曾智華 - 快樂傳媒老是佛|祿祿無窮

玩吓玩吓玩出意義!

講乜?正是講小弟十年前與「輝哥」吳錫輝,因為食加喜歡交友,故拉埋一班同是七十年代入行,經歷香港大大小小變遷的傳媒百厭星,組成「快樂傳媒老是佛」,目的在交誼及分享美食。起初,只有八人,每三個月聚一次,去邊度食我決定,輪流做東找數。

過癮在,你找一次數,可食足兩年才再請。

因太好玩,不少傳媒老友也步向退休年齡,要求加入。好!總之啱嘴型,價值觀相若就收。

收下一個收下又一個,去年變成十四個。但不幸今年初,其中一員施永遠,蒙主寵召,上咗天堂。如今變十三位。

每次聚餐,快樂無比。因紅白酒全場灌呀灌之外,當然大爆昔日秘聞。

不少,連我都聞所未聞!大開耳界!

三個月前,大家狂噴口水之際,小弟忽發奇想。我哋所講的,其實不少可以公開分享,實在吸引。不如咁嘞,搞次大型聚會,招攬其他傳媒「中是佛」及「老是佛」聚首一堂開心吓,然後,參加者人人捐一百蚊做善事,咁,就有飲有食有料爆, happy到震,兼人人做善長!

構思講完後,個個卸膊話:「好呀,咁……肥碌你搞晒佢啦!」

頂!搞咪搞!三個月內連搵酒樓、定菜單、做PPT、搵製作助理及收報名,全部一腳踢。九月一日晚,樂富商場「海鱻城」必嘈到拆天!
曾智華

hd