曾智華 - 點捨得飲呀|祿祿無窮

「小白」曾展乃「快樂傳媒老是佛」一員 ,每個月聚會。佢不時都孭住個袋到場,然後拉埋我一邊,靜靜雞講:「肥碌,我老婆畀你!」

佢老婆邊個?正是「大姐明」林建明!凡知佢老公見我,不時都會託送呢樣嗰樣,前晚,又送兩支有佢個靚樣的紅白酒。

嘩!咁有紀念價值,點捨得飲呀?

點解成日送嘢畀小弟?當然有緣有故,一切似是上天安排。因為,假若二○○七年佢冇遇上我,應該已經死咗!

故事開始,我在七十年代尾加入廣播界後,瘋狂工作,同時頂三份,又電台又電視又四圍搞各式活動。長期高壓工作下(絕對自願,自己攞嚟! ),終在九二年患上驚恐症。基於當年冇人知係乜,冇睇醫生,冇食藥,終於,慢慢演變為抑鬱症,精神系統不勝負荷下,開始深度抑鬱。

凡患此症者(大家可以到網上查),若冇適當治療,通常都會自殺了結生命。因實在苦不堪言,長期處於無望黑洞,再沒求生意志。

我幸而在二○○五年找到一種血清素,改善腦部失調,從日日夜夜「想死」邊緣康復過來。

再返電台開咪,度新節目,腦內閃出大姐明,遂約佢見面傾傾。

「智華,我想死呀……」講出狀況,正是深度抑鬱。幸而遇上過來人,小弟立即游說佢快搵醫生,並作康復見證。終又救回一個準備自殺的人。
曾智華
更多文章