任睇No.1
  • 27º
  • 91%
  • 2022年10月7日 星期五

曾智華 - 趕瘟神也被一刀切掉|祿祿無窮

前日,打開《頭條日報》及《星島日報》,兩皆大版報道國家副總理韓正指示——中央撐港拓暢通國際聯繫!

講,就擲地有聲。但實際呢?真係慘!馬時亨剛剛周遊列國回來,低歎香港被「撳住搶」!搶乜?搶人才、搶錢財!原因,唔使小弟再解釋喇啩?

不單止,近日與體育界老友晚飯,又係噴到成枱苦水。點解?又係大家心照。如今,香港乜嘢盛事都唔准搞。喂喂,國際體育盛事,你估得香港可以搞咩?你唔搞,一年係咁,兩年又係咁,如今,踏入第三年,個個國際城市開放晒,唔「搶嘢」就奇,真係絕不手軟㗎。

於是,搶吓一項,搶吓又一項,連國際龍舟賽都分分鐘冇埋,情何以堪?

搞搞吓,如今只剩國際七人欖球賽及渣打馬拉松⋯⋯唉,主辦單位你估同香港有親咩,若又有其他大城市提供更好條件,咁⋯⋯香港所有國際體育盛事,分分鐘被「剝光豬」!

更弊,如今因防疫而乜都話唔准做,搞到最離奇,連中國人趕瘟神的習俗舞火龍也被迫冚旗,都唔知有乜科學根據及邏輯。難怪已經組織到埋門一腳的大坑及薄扶林村班老叔父,火都嚟埋,㷫過焫雞。

中秋舞火龍,正是驅趕瘟疫,有一百四十多年傳統,無論實質及心理上皆幫到居民,故才可維持久遠而不衰。如今又被一刀切掉,條氣點順啊大佬?
曾智華

hd