任睇No.1
  • 28º
  • 79%
  • 2022年10月7日 星期五

曾智華 - 信吳彩平 歎蟶子王|祿祿無窮

上世紀八十年代中期,香港經濟大旺,四個字形容——紙醉金迷。行行都似「天降甘霖」,有用不盡的金錢。當時,尖東崛起,兩大夜總會中國城及大富豪,晚晚爆到七彩,不少豪客路易十六當水飲。

娛樂圈也出現黃金盛勢,張張唱片賣幾十萬張,演唱會一開就幾十場,簡直「印銀紙」。

暴發至此,間間公司應酬費任開,於是出現一個情況,就算小弟呢類打工中層也被寵幸。乜呢?正是凡入食肆,無論午晚,經理例必埋來,市儈微笑:「曾先生,今日返咗幾條老鼠斑,野生,又滑又正斗,手快有手慢冇!」

老友,老鼠斑幾錢條?最平「斬」你千幾二千,更何況,經理推介大群翅及本地龍蝦刺身,全部千千聲。俱往矣。九七後金融風暴殺到,人人回到凡間,腳踏實地。大富豪、中國城蒸發,也再甚少聽人食老鼠斑、大群翅、阿一鮑魚及本地龍蝦刺身……咁嘞。

前晚,摸去一間最近冒起的人氣食肆鵞鱻館,禮貌周周的女經理吳彩平推介:「曾先生,今日返咗愛爾蘭蟶子王,飛機貨,幾十蚊隻咋!」幾十蚊?全家掃五隻先,粉絲開邊蒸。上枱,嘩,勁!隻隻九吋長,新鮮又彈牙,正到不得了。嗱嗱嗱,咁至係正常香港飲食業嘛。腳踏實地,才可恆久致遠!
地址:九龍鑽石山荷里活廣場302C
曾智華

hd