任睇No.1
  • 19º
  • 71%
  • 2022年12月9日 星期五

曾智華 - 大領袖氣場|祿祿無窮

毋須水晶球,我都幾肯定,英國新首相卓慧思做唔長。因佢根本冇實力,冇料到,只是個黨內勢力妥協頂住檔的人物。

肯定,女皇喪禮之後,英國亂局立即開始。國會方面,保守黨內唔妥新首相又有野心者,勢必密謀上位,拋出這樣那樣的難題「跣」佢。

工黨方面,當然趁你病攞你命。卓慧思一上場即靠「借貸度日」(舉債萬幾億港元,以凍結電費、減稅及津貼能源費),長貧難顧而乏開源良方,點掂呀?錢會從天跌落嚟、樹生出來乎?

最弊,未上場已得失歐盟眾頭頭,毫無圓滑政治手腕。咁嘅卡士,又冇大領袖氣場,點鎮得住?

最弊,連英女皇都走埋,定海神針一去,北愛爾蘭和蘇格蘭勢必再鬧獨立,成個政治亂局,已穩穩待爆!

講起大領袖,一定要有氣派和壓場感,因政治非常凶險,你少一點魅力,少一點震懾力,都好快俾多方勢力「隊」散,因奪權大過天!

作為一個首相,卓慧思發自內在的威嚴,完全不覺。稍後國會辯論,大家必定見證一幕又一幕老政客、老狐狸玩佢嘅政治鬧劇。

講到大領袖氣場,有人問小弟認為邊個最勁?遠的不說,我有生之年見過的,包括:毛澤東、鄧小平(見圖)、邱吉爾、戴卓爾、默克爾、甘迺迪、曼德拉、李光耀、列根……但今個世代已少見。唯一,你喜唔喜歡都好,就是不時目露兇光嘅普京!
曾智華

hd