曾智華 - 唔准做評判!|祿祿無窮

港姐選舉,鬧出婆婆級前高官指「少布到不得了」,引起一場無無謂謂,但益晒TVB收視的小風波。

今屆港姐,有個talking point,正是評判陣容。因有位各方矚目女士——李林麗嬋, 即特首夫人(圖)!李太好日唔曝光,一曝,竟然做港姐評判,惹來不少好奇:「點解佢要做?」

從來,港姐評判為「風騷界」、「名氣界」、「玩家界」等人的「專利」。一般「保守界」多有點避忌,因在選舉過程中,一如余黎青萍指,佳麗要穿得「少布到不得了」,在你近距離面前行來行去答問題。

唔望又唔得,望,有中正余太所指——瞪大眼望到實(當然暗指有賣弄色情之嫌)。

講起做評判,小弟有位名人老友「大隻S」,因名氣大, TVB當然想搵佢做評判,增加宣傳也。搵名人,當然唔能夠由二打六出馬。於是,總經理親自出口邀請。S哥行走江湖,公關手段圓滑,八面玲瓏,與無記總經理又素有交情,當然不便推卻。但又心知,呢個位,真係分分鐘「中招」!於是回應:「咁……要回家問老婆大人!」

佢真係問。結果,大人只掉下一句:「形象唔好,唔准做!」但完全冇解釋有乜「形象唔好」。

唉,點搞?幸而S哥老友多,心生一計——我唔做啫,搵個喜歡出風頭名人頂咪得囉!終於掂晒!
曾智華
更多文章