曾智華 - 賽馬專家食白果|祿祿無窮

早前,本報有個「賽馬專家」,名馬識途,個個星期寫香港賽馬,由遠年掌故到現代賽事,非常有趣,亦顯示執筆者是個極度資深專家,等閒馬迷絕非佢一皮。好奇之下,四出打聽真人是誰,咁巴閉?

一查,哦,唔怪得知啦,原來正是馬會主席(剛卸任)陳南祿。有此背景,點會有馬事可飛過佢手指罅吖。

不過咁,完全掌握賽馬知識,是否必定贏?哈哈,答案係——不時輸就會!

呢呢,剛剛周日,小弟同佢又變「白果族」嘞,賽後在WhatsApp group打出幾個卡通:一、鋪草皮;二、銀包光晒;三、決定剖腹!

我輩馬迷,視投注賽馬為間接行善,從不肉痛之餘,輸光也會保持點點幽默感。反正,一周兩次。想贏?希望在人間!嗱,今晚又有快活谷賽事舉行喇。

跑馬,究竟邊個次次贏?能夠操控馬匹的練馬師及騎師?一於問道於老陳。

「騎騎,碌Sir,幻想!若練馬師咁易贏錢,使乜春夏秋冬雷電北風之下,仍朝朝三點鐘爬起身安排操馬?騎師也如是,個個搵命博,四十未到已周身傷患,你睇莫雷拉潘頓就知。根本苦差一份,全部財富主要靠獎金嚟。」

Philip卸任主席後,就將昔日本報專欄文章結集成書,取名《馬不停蹄》。出版即大受歡迎,雄踞暢銷書榜,Sure Win!
曾智華

hd