曾智華 - 殺一儆百拖無赦|祿祿無窮

行走江湖,應知所行止,切勿胡亂挑戰擁有公家權力者。嗱,再三聲明,係「胡亂挑戰」!見過幾次,某啲以為自己好巴閉者,去到外地海關態度囂張牙擦擦,以為有公民權就大晒,肆意呼喝海關關員,又或毫不合作。結果點?簡單,易位思考已知!

我有公權在手,執行職責。若你踐踏我尊嚴而唔作出招反應,必定令其他人有樣學樣,咁,重成世界?試過在美國及加拿大海關,見證某啲在自己地方可能惡慣者,意圖窒到外國海關關員飛起,並揚言投訴。結果?好好好,先生/小姐,投訴?隨便,唔該可稍後做。但我現在懷疑你走私,請入房剝光豬搜身,睇睇有冇體內藏毒!

一出呢招,十之八九嚇到面青,立即扮鵪鶉,頭耷耷死魚咁款配合搜查。

呢呢,剛剛深水埗警區就有可能精神有問題車主,非法泊車,竟在車頭放張紙,恐嚇抄牌執法者。

嘩嘩,咁重得了,離晒大譜意圖剃眼眉?若深水埗警隊放過你,重成世界?易,阿Sir即call拖車,將成架車勾走,再研究告幾多條罪。並在深水埗警區社交平台大事公佈——堅決零容忍!

你犯法重公然侮辱執法者,究竟係咪癡咗線?呢架車,肯定成為「深水埗明星車」,全區警員都會錫晒,狂餵牛肉乾。唔知今次告幾多條罪,總之,必定一身蟻!
曾智華

hd