曾智華 - 余香凝闖金馬獎|祿祿無窮

早前,小弟在專欄及個人社交平台勁力推薦大家入場睇《緣路山旮旯》,因久久未見這樣清新可喜的本地小品,必須鼓掌支持,以作激勵。我實牙實齒揚言——邊個睇完唔滿意,小弟私人立即回水!

豪言後,小小滴汗。因fb一共有近十萬追蹤者,若一成人睇完噓,嗌回水,咁我咪……死得,要嘔幾十萬出嚟填氹?

不過,嘻嘻,雖然網上咁多百彈haters,竟然冇一個叫我回水,連扮吓嘢都冇!

小弟推介此片時,票房約三四百萬。如今,已達千萬,真係飲得杯落。於是,決定真係飲杯,宴請監製鄺珮詩、導演黃浩然及製片馮惠思到戲曲中心「滿樂中菜」擦大餐,順便聽吓拍攝花絮。

討論的中心人物,當然為女主角余香凝,戲中扮演「咩姐」,可愛到不得了,人見人愛車見車載!

原來,拍此片時,佢已懷孕。整個戲組為遷就佢在未見肚前煞清全部戲份,趕到裙拉褲甩,終於搞掂。

小弟有一疑問,是「咩姐」咁清純,但戲裏爆過幾句粗口。究竟係真人演繹定導演或劇本要求?

「我加落去叫佢講嘅!」黃浩然直指,然後,解釋一輪現今香港的講粗口現象。事實,如今的港女,不少就是如此,早變順口溜而冇淫意。

飯後翌日,咦,新聞報道,余香凝提名金馬獎。不過,明明係女主角,點解變為最佳女配角呢?
曾智華

hd