曾智華 - 無奈說一聲再見|祿祿無窮

人生,難免遇上很多的無奈,其中之一,為見到努力經營而出品相當好的食肆,無奈結業。結業的原因很多,租金是其中一個重要因素。

個多月前,「線人Y」同我講:「碌Sir,好可惜啊,戲曲中心間滿樂中菜,就快唔做喇,仍然冇乜人知道。你去多幾次啦!」

自滿樂開業,帶過各路為食鬼去。因此處有間極好的貴賓房;服務員有禮;最勁,其蜜汁叉燒與片皮鴨,絕對是香港頂級水準。

不過……唉,人有運程,餐館也有。滿樂如此優質菜館,真的生不逢時。

重錘裝修開張,先遇上一場又一場的大型社會運動。繼而,鋪天蓋地的疫情殺到。大段日子不能開門做生意。就算可開,但戲曲中心的劇院冇劇上演,哪來客人。

經營者本來的想法,是早年香港極之渴求表演場地,觀眾入場前,會先醫肚。第一輪睇戲客離開後(約七點半),即可翻枱做第二輪。兼且,戲曲中心設計高雅,慕名而來參觀的遊客,肯定絡繹不絕。

結果?當然事與願違,遇上的情況與初初構想差很遠很遠。長時間捱打頂住昂貴租金,蝕到眼都突。點搞?

上月聽見「可靠消息」後,我即訂咗三晚貴賓房,與三群老友盡享心愛的叉燒(圖)及片皮鴨。席間,當然冇咁掃興公佈此店即將消失。

究竟,以上兩味出色之作,可會再在集團其他店出現呢?
曾智華

hd