曾智華 - 豬頭賊|祿祿無窮

做人做事,在「進步」過程中,一定要交學費,包括做賊!

有錢地方就有賊,此乃永恒不變的現象。不過,賊仔界,也似任何大機構,是一個三角形,最尖端最富有最食腦的,在頂層。中間的為普普通通智能一種。而最低的,也是最多的,正是蠢賊,又名「豬頭賊」。

其實,如今不少賊仔,已變精。犯法,不再揀搵命博又或要坐幾年監的罪,因學懂研究安全系數。

小弟年輕時,周街是「箍頸黨」、「扑頭黨」。而打劫,鋪鋪出真槍,以為做大賊好醒。這種罪案,拉到必定重判。事實,若一個唔覺意會搞出人命,可能就要告謀殺,最少都誤殺,郁郁坐幾十年至終身。

好嘞,如今,以上類型罪案差唔多冇晒嘞。打劫,用返刀,拉到都輕啲。

暴力罪案少咗,但冇暴力的騙案則大增,尤其電話騙案。

有位老友好得閒,某次與電騙小子傾電話刻意唔收線,更訪問佢為乜做啲咁嘢。

「阿Sir,好舒服㗎,work from home,o氹你買吓嘢啫,唔會好大危險。打一百個電話中一個,都搵到餐食㗎!」

真係乜人都有。

早幾日,又有豬頭賊,笑死人冇命賠,扮買家搶一架二手Tesla,以為走得甩。點知,原來佢係科技盲,唔知架架Tesla都有GPS,全天候監控位置。

如此豬頭,呢鋪學費起碼坐一年半載監。
曾智華
更多文章