曾智華 - 有得鍊 最興奮|祿祿無窮

有競爭才有進步,千古不易的真理。

冇競爭又點?只有大大退步!這個,作為「資深傳媒人」,過去四十年,真真正正親身體驗。

就以電視廣播而言,六十年代尾開始,TVB開始一台獨大,只得七十年代麗的電視及八十年頭亞洲電視有零星威脅。但次次皆如是,攻勢未成,已被無線用獅子撲兔式重錘扑低。對手挑戰,次次只能曇花一現。

終於,長年獨霸下,自己陰乾自己,由於一台獨大,搞到全行皆弱。點解?簡單,在冇對手情況下,第一,自己點會fit?第二,唔使打仗,生意人當然cut cut cut,包括人工,如此,點會有士氣?

同一時期,電台方面,則打到飛起。七十年代開始,香港電台與商台日日鍊,鍊足四十幾年,由年輕人節目鍊到大炮式時事節目,創造出百花齊放,電台影響力大過電視台的奇景。

今天,一切在政治大氣候影響之下,俱往矣。

但係,究竟是否傳媒已屆末日之時呢?當然唔係。世界之大,難道只得政治一瓣?

事實,重有交通、醫療、環保、房屋、教育、體育、娛樂、商業、投資、創意、科技等等領域可以大做兼鍊鋪甘喎。

千祈咪自己唔做就賴乜都冇可為。縮就輸一世,一定要見空間就上,維持生命力。

電視台當然如此。且看最新的Hoy電視點發功嘞。
曾智華

hd