曾智華 - 房署總部阿哥快放位|祿祿無窮

一九七八年,小弟到《歡樂今宵》做助導,有一個非常煞食環節,有效到飛起,名《眼中釘》。晚晚何守信大大聲嗌——睇唔過眼要出聲,快啲寄嚟眼中釘!

「睇唔過眼」的信,雪片飛來!點解?第一,小市民唔識投訴;第二,投訴無門;第三,俾班官當波踢,投訴信只在不同部門遊埠。結果, 十之七八肚氣。

傳媒威力在,投訴有聲有畫。部門首長,人要面樹要皮。兼且,若部門有事唔解決,唱到周街知,你上司及上上上司會點睇呢?故此,凡《眼中釘》個案一出,必火速搵掂。由此,招牌變權威。

不過,你知我知,呢類投訴, 必是雞毛蒜皮小事,做得多,晚晚重複,已冇乜吸引性。況且,你可做,個個媒介也可做,並非獨家,冇乜巴閉?故此,最終仍淡出。

不過,《眼中釘》呢種「傳媒監察力」仍長存。呢呢,小弟就正不停被生張熟李要求「仗義執言」。最近一單,有理,即偵查。

幾個月前,居何文田區老友話:「碌Sir,我唔係投訴,我係懇求!懇求房署總部班大哥,周日不用上班,唔該放返商場啲車位出嚟俾公眾用啫!」

有啲咁事?易!立即用兩個周日做偵查。果然,停車場外排大隊,停車場內則不少空位(圖),房署阿哥放假仍霸住晒啲泊位。喂!此非私人「財產」噃,快放返出嚟!
曾智華

hd