曾智華 - 你認識張宇人?|祿祿無窮

周六下午,電話響起。今時今日,凡冇來電顯示電話,我一概唔聽,免得同班無聊騙徒糾纏。

但呢個,乃精神科醫生朋友L,佢早年也兼讀中醫,對兩方面的理論,相當熟悉。

「碌Sir,你做咗幾十年傳媒,一定識張宇人(圖)㗎,係咪?(識,但唔熟,也非朋友!)你可否代我俾少少忠告佢呀?」

小弟與張宇人交往,始於九十年代,一同在沙田馬會管理委員會做義工。直覺佢乃富二代,有點公子脾氣,但總算得體有風度。

一轉眼, 二十多年。我已早早退,當然冇同佢聯絡。

老張在政界愈戰愈勇,立法會冧莊再冧莊, 二○一六至二○二二更出任自由黨主席,好不威風。早前,終坐到上行政會議。兼且,連大紫荊勳章都攞埋。

如此背景,公眾期望,係希望見到佢言談得體,有分寸。兼且,須常顧及政府最高層及大紫荊勳章的形象,理應比普通人更有修養,處事更decent。

不過,很可惜,唔知點解,近月頻頻見佢扯火。主持會議時,曾與田二少及梁美芬互片,最後趕二人離場,略欠做主席的包容量度。而飲食界其他人講意見,又俾佢窒「扮代表」。周六更爆出佢在中大校董會議中撩香樹輝「隻揪」,完全不似正常的態度。

醫生朋友觀察佢近期情緒控制,覺得有點不穩及易上火,故忠告應去睇吓醫生。
曾智華

hd