曾智華 - 抵死到爆|祿祿無窮

前高官大F退休後,風騷到爆,毋須再講乜乜line to take及堅守政治正確。總之,平民一個,行使言論自由,窒完人又唔使自己做,幾爽!一如所有「自由人」,凡見有乜過癮嘢,立即四圍傳,好讓老友開懷大笑。

大F線路縱橫,人脈遼闊,收料特多,故此,放料也多,全部質素相當高。

昨日又嚟料,小弟手機突然彈出「當紅炸子雞」辛偉誠照片(圖)。當然唔會係齋照片,上有英式幽默配字——It took the whole British Empire to Attack, Conquer, and Colonised India, but Just One-to conquer the British。

當年英國打生打死搞到成身汗,動用全國之力才降服印度,變殖民地。如今,只需一個印裔人士就搞掂整個英國!

非常啜核!

辛偉誠有幾勁,等睇。英國經濟千瘡百孔,國內問題杰撻撻(國家分裂、各行各業罷工、政府窮到燶、工黨日日鋤!)真要有超人神力才可瓣瓣擺平。

此外,更要睇佢在國際舞台上周旋於歐洲各國、中國及俄國之間。

你咪以為美國會錫住英國。美國霸權主義下,最好個個國都變弱雞,全部叫我大佬。若係對手,就更想一隻手指捽死你!
曾智華

hd