曾智華 - 呢個炒飯真精采|祿祿無窮

香港有幾款食物,低至地痞茶記,高至六星級中菜,廚師必定識做,例如:咕嚕肉、乾炒牛河⋯⋯全部講個鑊氣,廚工高低,入口便知。

其中一樣出品,冇個廚師唔識做,正是炒飯。間間食肆都賣揚州炒飯,個個香港人不停食,自然全部是專家。

上周,食神關照,遇上一客精采的炒飯,放面前時,雖已飽到上喉頭,不過,品嚐一啖後,根本停唔到口,死就死,肥就肥,終於,一粒米都掃清光,真係正!

話說,老友有喜請客,拉隊去咗一間位置略偏僻,名叫「吹牛會館」的食肆。豪一豪, 歎其阿拉斯加大蟹鐵板燒。

鐵板燒歷久不衰,因充滿視覺享受。大廚在你面前表演,根本唔衰得,個個整齊制服,由用料到手勢,全部要一絲不苟。其實,壓力相當大。

老友選咗每位1,480元的「吹牛鐵板燒御膳」,豐富到不得了。由火炙和牛壽司開始,廚師完全冇停手,跟上的燒巨蟹、黑邊鮑魚、日本甘鯛,美味頂級。

中間隔一隔季節沙律,清清腸胃後,又再重量級上陣,來客鹿兒島伊藤牧場黑毛和種牛。咁食法,怎不飽到上心口?

不過,原來最精采的,是壓軸——京都松葉蟹肉炒飯。本諗住打包返歸俾老婆大人,點知,試一口⋯…死!太好味了,根本停唔到。無法,搵次再帶大人品嚐可也。
曾智華

hd