曾智華 - 麥沛東非常耀眼|祿祿無窮

早前的本土電影《緣路山旮旯》般,出閘普通,但基於有質素,開始口碑轟傳,終於,一套小本製作,沒有大卡士的電影,大收過千萬。此乃非常可喜現象。

過去幾年,經常聽見人對港產片講一些負氣的言論。其實,只要是超卓的,一定有機會爆出,毋須乜都只講內地市場。

剛剛睇完另一套口碑之作《正義迴廊》。起初單見片名,唔知佢搞乜,加上導演及主角完全在電影圈不見經傳,故並冇立即入場意欲。

幸而,碰倒所有睇過的朋友,無不豎起大拇指,瞓身推薦。好,即睇!

果然冇介紹錯。此乃導演何爵天處男之作,但絲毫不似新手。反之,功架十足,操控節奏、氣氛,引導演員發揮(尤其兩個男主角),有非常超卓表現,肯定前景一片光明。
  此片得到電影發展基金撥250萬作融資,今次,眾評審應飲得杯落,因產品實在出色。

改編自真實發生的《大角咀肢解父母案》,理所當然,由頭帶到尾的,就是兩位被控謀殺的被告。演繹者為楊偉倫及麥沛東。兩皆舞台劇出身,晉身大電影,其演技,彈離不少天王級演員。

尤其麥沛東(圖),真的可用「犀利」來形容。演出的水準,絕對可以問鼎下屆香港電影金像獎最佳男主角。事實,佢早前已在「香港國際電影節」掃下最佳男演員。各位,信我,一於入場啦!
曾智華

hd