曾智華 - 收視率out咗?|祿祿無窮


最近,TVB管理層條氣好唔順,頂到上心口。因新劇《下流上車族》創出近期高收視,最高達二十三點七點。不過,廣告收入並冇相應上升,所以,出帖話「匪夷所思」,間接問係咪有人「有眼無珠」,落廣告決定「欠邏輯」。
一石激起千重浪,尤其廣告界,非常踴躍發言反應,當然,站在無記一邊的,好似冇乜。
  事實上,又好難認同TVB,因一直以來,廣告商由落廣告以至揾代言人,都不是只以收視率、知名度以至擁躉多少落決定。重要的,是否準確命中「目標」。否則,嘥子彈。
  這個,在網絡世代尤其鮮明。網上有千種節目及百計KOL。廣告商落邊個節目,有晒科學數據,故似「小李飛刀」,例不虛發。
  無可否認,TVB在廣播方面,擁有最多觀眾數量,不過,相當集中在平均年紀大、學歷不高及住在公共屋邨的一群。其實,決策層應該度身訂造,專攻佢哋會幫襯的機構及商品。例如,領展商場旗下的店舖及日常用品。必須瞄準中低消費為主攻目標,包括所有超市集團,連鎖快餐店,健康用品集團,家品集團……

小弟並非專家,但久不久睇吓無線,都覺得這方面仍有很深潛質可以開發。

論收視率,另一熱話為HOY TV《就是青春》,低見零點三點。電視台最現實,邊有得唔斬?
曾智華

hd