曾智華 - TVB本應捉到鹿|祿祿無窮

無線電視新節目之中,有個可能會爆出——《中年好聲音》。

多年來,凡歌唱比賽,必只做年輕人。但若有去過卡拉OK或不同機構周年晚宴,自會發覺,四十歲以上者,不少唱得極出色,因開始有點人生滄桑經驗,具有韻味。日日睇得多年輕歌手,若突然殺出一批歌藝超群中年歌手,隨時可贏收視率!

《中年好聲音》,走勢可能出人意表。參賽報名,極踴躍,有三千人。結果,選出一百強,且看無記點炮製此節目。

不過,小弟想指出一點—— TVB走「寶」!

眾所周知,做廣播,必須有talking point,而歌唱節目的吸引,並不一定在唱得好唔好,反而,參加者的身份,會引起大眾好奇。

傳媒高層老友傳來一條片:「碌Sir,快睇!」

咁講當然有料到啦。立即睇……哦,正是《中年好聲音》初選,一位光頭肥佬,街坊裝、三個骨褲加T恤就上陣,七情上面演繹《西遊記》的《一生所愛》(見圖),唱得頭筋也現,絕對肉緊。乜咁熟口面?哦…正是著名國際政治評論員許楨博士。此君背景犀利,乃倫敦政治經濟學院國際關係碩士,香港大學亞洲研究中心博士,中文大學未來城市研究所副主席。更重要,為無記「敵台」的主持!咁嘅身份來參加《中年好聲音》竟輕輕放過唔大做?走大雞喎!
曾智華

hd