曾智華 - 時光倒流抵食早餐|祿祿無窮

上周某朝,因公事要六點開工。之前,當然要食飽飽,點搞?

一般茶餐廳開七點。通宵則有老麥,但非我杯茶。點搞?

唔怕,呢度係香港,一定有通宵食店開。於是揸車落土瓜灣四處兜,兜呀兜,兜到譚公道有間「文記車仔麵」,燈光火着,門口寫上——二十四小時營業。

掂,立即衝入去!時為清晨五點幾。全店有兩個長者阿姐睇檔,由炒麵煲粥,沖奶茶煮車仔麵,再到樓面落單抹枱收銀,全部兩腳踢晒,犀利。

坐低睇餐牌!嘩!價錢時光倒流!粥麵餐三十一元,包花生眉豆豬骨粥,豉油皇炒麵及奶茶。即「柯打」一份。全部當然ready made。

「哥仔,你走運,麵剛剛炒起,熱騰騰㗎!」

人手不足,阿姐將全部食物放水吧櫃面客人自取。面前有一排不銹鋼大碗,內有各種配料任攞,包括榨菜、青蔥、薑絲、辣椒油……等等。當然,「道具」也是自取。

先將青蔥榨菜放粥面, 再全部拿到枱,慢慢歎,睇吓乜嘢水準。

食完,真係冇得唔服呢間文記。喂,究竟佢哋賺乜嘅呢?又要燈油火蠟冷氣人工。又要俾咁鬼多嘢你食。竟只收三十一元?

粥,相當得,內有不少豬軟骨。炒麵,合水準。唯一杯奶茶,用次級奶,飲唔落。各位,住附近,凌晨肚仔餓,殺去幫襯可也!
曾智華
更多文章