曾智華 - 唱到自己冇得食|祿祿無窮

日子有功,經過多年建立為食形象,久而久之,不少同路人追睇我介紹的所有大中小食肆。高至米芝蓮,低至「掃街」級,總之一講,就蜂擁去試。結果,出現兩個情況:

一、鬧到飛起。點解?因為,小弟多是識於微時,幫襯時,冇乜人知,尤其小店,面積有限,人手有限,出品能量更非常有限。若突然湧出千百生客,點頂?當然無法維持正常質素,兼更可能搞到冧檔!

事實,間間正常食肆都有一二三廚,輪流休息。低層的,也要有機會埋鑊,絕不能吓吓大師傅上陣;加上周三跑馬,周五六日忙到甩轆,自然難維持一貫的高水準。於是,聽小弟介紹慕名而來的,在不適當時候齊齊殺去,小店根本頂唔順,自然失望。一失望,當然罵我,結果,無奈硬食。

二、我都冇得食。N年前介紹過兩間誠意小餐館,分別為紅磡廣場的《Cafe Idea》及同區的《東煮有喜》,分別由兩對夫婦經營,丈夫為廚師,有心有力有火,質素自然高。小弟一介紹,立即大量生客湧到。但兩間店拒絕降低質素求客量,結果,排大隊,要等半年以上才有位。

算嘞,冇興趣等,再發掘其他隱世高手好了。

早前,在此介紹九龍城廣場超市的澳洲和牛牛𦟌,慘情,昨天再去,售貨員話:「朝朝開門俾人掃清,長期冇貨嘞!」

死未!唯有改食肥美的美國牛肋條囉。
曾智華

hd