曾智華 - 戇居仔、巴巴閉|祿祿無窮

香港地,有不少傻吓傻吓的懵仔,睇得類似《古惑仔》一類黑社會片多,代入晒,行路掗吓掗吓,在自己地頭蝦蝦霸霸。久而久之,真係《古惑仔》主角上晒身,郁郁四圍「兇」人,粗口爛舌。

呢種態度,恰善良小市民就得,但若過份囂張,必定遲中俾人兜頭扑一嘢勁的,睇你點死!最重要,到時你自然會知——究竟邊個話事?

呢呢,又中喇。

周二,有位交通督導員到深水埗楓樹街及福華街抄違例泊車,竟然彈出幾個「車房仔」(因佢哋樣衰衰,冇理由稱車房職員嘅)高聲辱罵及意圖阻撓執法。見到有路人圍觀,更為囂張,恍似扮演《古惑仔》電影主角。督導員立即call來警員,幾丁車房仔仍唔識死,大呼:「你知唔知我係邊個?」(其實,真係識佢老鼠! )

結果,整個過程俾附近司機拍低立即上載。一通天,當然該區大Sir收到報告。

就咁——睇吓邊個話事情況立即上演!大隊警犬隊、反三合會行動組、交通警……殺到現場招呼幾丁懵仔。先將違例泊車拖走,再告冇戴口罩(每人罰五千元 ),然後,鎖晒返警署,最少告公眾地方行為不檢。

N年前,老差骨朋友曾對我講:「呢類傻仔,以為好巴閉。一拉返警署即腳軟,再掟入『臭格』羈留『鐵籠』踎過夜,然後慢慢落口供。到時,乜都謝晒!」

肯定楓樹街福華街違泊,有排被認真招呼嘞!
曾智華
更多文章