曾智華 - 師奶注細細巴巴閉|祿祿無窮

世界盃,真好玩!因為識唔識波都好,一個星期未夠,大家竟完全變成「球評家」。兼且,平日唔多睇足球的,為了趕熱潮,也加入「熱烈討論」,並且指手畫腳。

例如小弟朝朝歎早餐的茶記,有班師奶團,平日話題,永遠係超市有乜着數及邊個藝員有乜衰嘢等,而對政治及體育賽馬,一概不通(剛剛與另一枱的司機大佬相反!)

哈哈,但係,今日竟然講起世界盃,並揚言不停中!

有冇咁巴閉?好吸引喎。搞到我都豎起耳仔偷聽,究竟「師奶球評家」有乜秘笈?

A師奶:嗱,我買波,從不研究,事實亦唔識,場場只買最冷一瓣。結果,開心死,買咗十幾場,贏咗超過一倍利潤啊,哈哈哈!

點解佢咁勁?簡單,因為有三場爆大冷,包括:(一)沙特阿拉伯贏阿根廷二比○; (二)日本贏德國二比一;。 (三)哥斯達尼加贏日本一比○。

三場加埋有幾多倍?大家計計啦。

另一位師奶,又係贏,又係唔識波嘅。

B師奶:A嬸,你就專買最冷。我呢,哈哈哈,都贏喎。同你一樣,鬼識邊隊打邊隊咩,只場場買一瓣——和!因為,和的賠率有三倍幾到四倍幾,中一場等於三至四場注碼。結果,又係中到開巷,朝朝起身就有錢收!

各位資深球迷/球評家,你哋服未?無論你用幾多角度又分析又拆局,再研究埋教練戰術球員質素,最終都輸到趴低。但兩位肥師奶乜都唔識就⋯⋯
曾智華

hd