曾智華 - 愛佢?害佢?|祿祿無窮

日前,國際新聞版頭條,再不是令人睇到心情低落的大災難或俄烏沒完沒了的戰爭,而是一個肥佬拖住肥女兒接受上萬軍隊歡呼的照片。一片詳和與喜樂。(表面如此! )

標題——金正恩稱北韓將擁有世界最強核武;平壤首稱金主愛為「尊貴千金」。

我一睇幅相,腦際浮起的,並不是肥仔金慈父與愛女的親情感覺。而是——喂,老友,你究竟係愛佢定害佢先?

一個九歲細蚊女,本來應讀緊小學三年級,天天一嚿雲咁開始認識「善良的世界」(教科書出現的,必定導人向善,唔會導人向惡!),然後,快快樂樂成長,完成中學後進入大學,開始學習獨立思考,接觸各種學術理論,再決定自己人生路點行。

如今?豆丁咁款已被父親狂捧成「金叵羅」,再狂晒特權,似閱兵咁款接受過萬軍人鼓掌歡呼。究竟,憑乜?呢種細細個已被捧上天的感覺,百分之一千建築在浮沙之上,絕無半點基礎,一遇少少考驗,即會似冰溶化!

我真的好有興趣,睇肥仔金咁搞法,會將個女變成乜?會否變成「童年女魔頭」呢?

說來,有一個謎,世人仍解不開。以北韓畀外人感覺的封閉、貧困、落後,究竟點可以製造出world class核彈,搞到美國佬惶惶不可終日咁厲害呢?以前,西方世界形容北韓人個個傻吓傻吓,又冇知識,又食唔飽,似機械人般只懂聽領袖點東點西。但科技點解會咁發達的呢?
曾智華

hd