曾智華 - 邊個高層要打屁股?|祿祿無窮

前朝睇《頭條日報》,揭呀揭, 揭到「頭條娛樂」一版,見到個標題,即刻窒一窒。

乜呢?寫着——陳詠燊拎大綱向電視台sell劇本冇下文!

今時今日,陳詠燊係邊個,你冇理由唔知啩?冇錯,佢正是當今香港最吃香的編劇(唔使之一嘞!)及邁向八千萬的《飯氣攻心》大導演呀!

堂堂香港電影史上的當紅炸子雞,半年前攞個劇本去「拜見」電視台高層傾劇本,竟然得個桔?小弟一睇呢段嘢,已知會起哄。

果然!周三晚上,約咗班極資深傳媒前高層晚飯,個個年近/過七十,但仍周身火兼多口成性,窒人唔使本。一講到呢單嘢即㷫烚烚。

老總A:喂喂,一定要查查邊間電視台走寶,捉到鹿唔識脫角!更重要,陳仔搵的,必定最少是戲劇組高層至總經理級,邊鬼個咁「有眼無珠」?董事局必須徹查!咁大疏忽,可能冇咗幾千萬生意!

蠱惑B:A哥,你咁諗,相當正路。不過,就小弟縱橫影視圈數十年,真係乜嘢人都見過,忠嘅係唔少,奸嘅更多。奸人做法,不少專恰新仔,叫人向佢sell劇本,sell完,一係話唔掂,一係冇晒聲氣。原來自己將條大「橋」改頭換面,然後當自己嘢!娛樂圈最多奸人「偷」劇本及作曲意念㗎!

老老實實,多年來,小弟都聽過唔少。希望今次當事人快快挺身而出解釋。否則,等到俾人查出時,水洗唔清也。
曾智華

hd