曾智華 - 師奶嘈到拆天|祿祿無窮

上周三本欄刊出——師奶注細細巴巴閉。

內容指出,小弟慣性早餐的茶記內,有兩幫嘈嘈閉熟客,男的一枱為的士阿叔,朝朝「論政」,總之,凡事彈,彈到樹葉都落,之後,舒服晒,八點前鳥獸散開工去。

女的一枱為肥師奶(冇瘦師奶㗎!),專交換超市抵買情報,另又詳細分析娛樂版新聞,尤其針對有乜藝員衰嘢(好嘢佢哋全部冇興趣),集中講緋聞,邊個同邊個偷食之類,最為肉緊。

不過,世界盃一開,肥師奶們立即轉軚講波,與司機大叔對着幹。司機大叔長年睇波,故分析得頭頭是道,由教練戰術到球員質素等等,相當有層次,逐場講。不過⋯⋯慘情,佢哋投注,輸到瞓街!

但班肥師奶呢,睬你都傻,雖分成兩派,但完全唔研究每隊打法及實力。第一派場場只買最冷一瓣;另一派,場場買和。結果顯示,第一派贏到開巷,第二派也有微利。

上周五早上小弟闖入茶記,已聞嘈到拆天,班肥師奶竟在大唱日本歌。我當然知點解啦,因又再爆大冷,日本隊砌低西班牙,贏二比一,隔夜有成七倍,再大豐收。

佢哋咁招搖,當然惹來的士大叔不滿,窒之:「根本場波假嘅,西班牙放水咋,你班師奶識乜吖,睇球隊走線啦,懵閉閉!」

哎呀,好在班肥師奶贏咗錢大包容,否則,分分鐘火星撞地球呀!
曾智華

hd