曾智華 - 喜見快樂足球再現|祿祿無窮

世界盃進入十六強,開始打真軍,場場賽果正路。點解咁?因分組時,各隊最重要是:(一)出線;(二)走靚位避強隊;(三)用輸或贏篩走最強的對手。故此,會不時出現「驚人冷門」。

所以,本欄提及的肥師奶,就中到開巷,場場不問因由,只買爆冷。

不過,一到十六強,一場定生死,隊隊即時露出真面目,舖舖鍊盡施展渾身解數。

你想荷蘭、阿根廷、英國、法國及巴西球員,突然「夢遊球場」?好⋯⋯難嘞。

打到周一為止,最令人興奮,是重見巴西打出皇者風範。不止,更重要,再次帶來快樂足球。進攻時水銀瀉地、珠走玉盤,球員似齊齊在跳森巴舞,非常悅目。

資深球迷,多數不喜歡意大利或德國一類作風。前者只玩銅牆鐵壁,後者則似機器,體能高紀律嚴明,不過,毫無足球藝術成份可言。

巴西不同,球員落場,個個似快樂地玩玩吓,只在享受足球,而非要拼過你死我活。

尤其,一旦對着弱旅,更加好睇到震。因可以將對手玩弄於股掌中,帶佢氹氹轉菊花園。

巴西「血洗」南韓後,下場對克羅地亞,點睇都冇得輸啩?因克羅地亞連日本都無法技術性擊倒,要靠十二碼分勝負,好渣啫;加上,呢場打到加時,體能消耗極大。相反巴西,早早收起尼馬,儲夠體力再戰下場。

十二月九日晚,大家再享受「森巴足球」可也!
曾智華

hd