曾智華 - 呢隻豬手脆卜卜|祿祿無窮

踏入十二月,有幾樣季節性食物,大家不停有機會歎。包括:大閘蟹、羊腩煲、蛇羹及食正啤酒節的脆卜卜德國鹹豬手。

以上四味,皆普通食物,一般廚師必搞得掂。正因如此,功力高低就好易分。

小弟從來有一偏見,覺得私人屋苑會所出品,唔慌好食。點解?一來,客路太窄,只做圍內客,自然唔會出高薪請段數勁的廚師。

其次,英雄最怕無用武之地。到會所食的,既然皆屋苑客人,花錢肯定不多,要求也不會高,日日如是,只做普通菜式,高手廚師必覺好鬼悶。

故此,凡有朋友請去屋苑會所晚飯,我多推三推四,反建議:「 不如帶你去乜乜物物吖,正斗好多㗎!」

正因期望不高,哈,上周末工作完畢,好攰, 拍檔老友B提議:「碌Sir,就你,近近地去你家附近皓畋會所餐廳吖,我有會籍!」

「……」小弟立時間面露猜疑之色。

B哥知我諗乜:「放心啦,佢哋一千四百幾個單位,夠晒客,故此,會所可以請到好廚,掂㗎,信我一次,試吓啦。自己帶酒也只收五十元開瓶咋!」

既然冇乜精力,好啦,嗱嗱聲求求其其一餐食完返歸瞓啦。

豈料,在冇乜期望下,食出少少驚喜。有三味相當出色: 黃金蝦球(鹹蛋黃香噴噴,有水準!)、安格斯牛河(用正宗安格斯牛肉,夠腍夠多汁)及一隻只收百一蚊的脆卜卜焗德國鹹豬手(見圖)。皮脆肉香,火喉掌握到位),無論用紅或白酒送,無以上之。唔……咁正又咁近小第家居,肯定有下次!不過。又要勞煩B哥帶來嘞。

順帶一提,此處客路斯文地方寬敞,氣氛舒服。
曾智華
更多文章