曾智華 - 本地牛𦟌頂呱呱|祿祿無窮

早前小弟在本欄透露,在九龍城廣場買到條正斗澳洲和牛牛𦟌,肥美𡁻頭佳。豈料,一登出來後,即日開始再「冇貨賣」!

因為,唔知邊個咁神心,見一條掃一條,搞到我呢個「始作俑者」也口糠糠,從此玩完!

條氣當然唔順!天下之大,難道只有嗰處的牛𦟌最靚最美味?

於是,繼續四圍巡。巡到落九龍城街市,見一專賣優質本地牛檔口,掛住四條本地牛𦟌。於是問阿叔:「叔叔,邊條最正呀?」

「當然最貴一條最正啦哥仔(其實我都已經是長者), 一分錢一分貨呀。嗱,想平就食呢條,(指住最奀一條),嚿鬆啲水。想靚就食呢條(指住最肥美一條),兩嚿過外㗎!」老派人講嘢,唔會有油淋淋老sell口脗,實實在在,一就一、二就二。

老友,既然想食上等貨色,就唔差在一嚿水,當然要最靚一條啦(圖),順口要求:「師傅,唔該你幫我起咗啲筋佢!」

「有冇搞錯,買牛𦟌唔要筋?精華所在喎!」 教仔咁教我:「嗱, 返屋企,切片,用滾水灼下,將血水清一清,再用大量配料炆之。腍咗之後,牛筋起晒膠,啖啖彈牙,正呀!」

返家請菲姐SALLY炮製。睇佢切時,非常黐刀,擺明又新鮮又優質。

今鋪炆咖喱。加入大量薯仔、洋蔥、甘筍……夠時間,一開蓋。嘩……滿室芳香,流晒口水。

果然冇介紹錯。新鮮牛𦟌今勻揮低冰鮮和牛嘞!
曾智華

hd