曾智華 - 笑死冇命賠|祿祿無窮

世界盃打到今日,已屆尾聲,無論邊隊冠軍,都要落幕,將一個月的全球亢奮降一降溫。球星們跟着又會似機器般,回到各大聯賽繼續全速拼搏。尤其英超,部「聖誕快車」真係會將所有人玩到殘。無法,因全部是搖錢樹!

世界盃,球場內好看,球場外又如何?一樣全部俾人攞嚟做娛樂!

尤其西方的漫畫家,可以無邊無際哋玩盡一切,無恐懼官非,所以,精警出品特多。

其中一個非常抵死幽默,但可惜吖,小弟不能在這裏登出,因並非一級。故此,只可用文字形容。此乃一幅模特兒靚相,主角有型有格,身材top fit,在賣一個胸圍廣告。

奇在,胸圍只有帶而冇胸杯,即赤裸裸兩邊乳房全面曝光!

抵死之處在文字,寫上:Victoria's Secret has launched a new bra called “England”….with plenty of support but NO CUP!

真係將英國隊窒到飛起,一矢中的玩殘!

另一幅,又係玩死英國隊的漫畫(圖)。

畫中主角為一個死囚, 被綁在柱上準備接受槍斃。行刑前,負責軍官問佢:「你有乜最後要求/願望呢?」

死囚眼眨眨回應:「我要求哈利卡尼負責take the shot!」

點解?真正球迷必定個個笑到標眼淚!因為世界盃英國出局,正因隊長哈利卡尼射十二碼miss the shot,令所有英國人同聲一哭呀!明未?

但願香港充滿這種幽默空間及天才。
曾智華

hd