天寒地凍。真係冷得我騰騰震，震到呀入呀呀心呀 ……（學名伶新馬仔唱返兩句）。
今個星期，寒流殺到，點搞？當然透過食食食，維持身體溫暖。
火鍋？正！故必定處處人頭湧湧。另外，整返煲新鮮黑草羊，古法炆，也是無以尚之。
小弟提議大家考慮，歎返個潮州地道名湯——荷包燉白鱔又如何？
前日，凍到雪雪聲，立即call齊幾丁為食老友晚餐，預早打電話畀「百樂集團」總廚許美德，聲明要來個暖胃湯，問有乜介紹。
「碌Sir，一於整煲荷包燉白鱔你歎啦。入冬後大鱔極肥美，我用胡椒鹹菜燉之，一啖入口，周身發滾㗎，好唔好？」
殺！時候到，踩去美麗華商場「滿樂」，呢個商場，非常就腳。但極大缺點，為停車場收費奇貴（供求問題？），兼且，大業主孤鬼寒，客人消費，只有一小時免費泊車，又兼且煩到癲，要人搞到周身汗入佢個乜乜物物會。
起菜！先來大盤滷水鵝肉鵝肝鵝腸。食到舔舔脷，好耐冇試過咁肥美鵝腸鵝肝。膽固醇？話之佢啦，人生苦短，唔食等幾時？
此店的蘿蔔灌漿也是誇啦啦冇得頂，入口外脆卜卜，內裏蘿蔔半溶化，好味到震。
主角上場（見圖），開蓋即冒煙，攻鼻而來正是鹹菜胡椒香。咬一啖白鱔喝一口湯，果然，不足三分鐘，人人要寬衣，開始周身滾也。
曾智華
;){kind=link}
;){kind=link}
;){kind=link}
;){kind=link}
;){kind=link}
;){kind=link}