曾智華 - 呢款酸菜魚得!|祿祿無窮

我係為食鬼!為食鬼特色,行又諗食,企又諗食。周街逛,女人可能睇化妝品、名牌、護膚品、靚衫靚鞋……小弟呢?獨沽一味——食食食。到超市也如是,除睇紅白酒邊款減價外,必定行埋新鮮肉類、魚類及家禽檔位。然後,再走到急凍櫃,睇睇有乜新產品。

香港人,個個忙,邊有時間慢慢在家煮食,故必定有齊即食麵外,冰格一定有各式點心水餃等,可以一「叮」即掂的食物。

我喜歡飲湯,故亦有幾款冇味精添加的湯包,想飲時,放入爐中一滾,熱騰騰即可靚湯上枱!

近年,中港都興食酸菜魚。酸酸辣辣,非常惹味。冬天整一碗,全身發滾,感覺好正。但要自己煲,真係麻鬼煩,尤其要買魚又洗又切,花的時間與享受,根本不成比例。

哈,終於,又俾我撞中一種方便快捷質素頗高的酸菜魚,幾掂吓。

家住土瓜灣附近,日日早餐後,先運動,再兩頭遊。上周,遊到靠背壟道百幾號,一間批發零售凍肉店。瞄瞄先。咦,有不同地方的急凍雞翼及豬牛羊喎。大雪櫃中,有一款名「重慶金湯酸菜魚」(圖),好,試試佢!

返家用八百毫升水滾起湯包、酸菜及配菜,稍後加入解凍魚片,煮三分鐘,下一匙熱油。入口……正!冇味精!魚片新鮮,冇骨。很少湯包有此專業水平。
曾智華

hd