曾智華 - 寒風/暴雨運動場|祿祿無窮

人似汽車,應該由零開始保養。若錯過咗「黃金時間」,也不要放棄。總之,愈早錫住佢,就可以似盧寵茂局長講,少啲病、長啲命!一切,必須自己做,冇得假手於人。

人生保養,有三大要點:情緒、休息、運動。真的是「阿媽係女人」理論。但,你有冇做?

若果日日心緒不寧,生活情緒皆高壓,自然損壞免疫系統,一定會病欺人。故此,必須調節壓力,控制情緒。唔識做,請教臨牀心理學家可也。負擔唔起,可去「心晴行動基金」求助。

休息方面,若不能做到早睡早起,也必定每日要有七至八小時休息,讓身體器官得以修復。切勿以為自己係鐵人,日日狂踩油猛捱。如此,一定會谷壞車頭,所謂「冧偈」,到時,真係畀個皇帝你做都冇用,因為已經「醫番嘥藥費」!

另外,就是必須持之以恒天天運動,令血氣筋骨運作暢順。運動時,身體會有快樂賀爾蒙安多酚分泌,令人開心紓緩,心理生理皆受惠!

運動重要,但若天氣似上周咁,凍到飛起、寒風刺骨,點搞?

我呢,早早已發掘出一個打風雷暴或寒冷天氣時的運動場,正是公共屋邨停車場(見圖)。

私人屋苑停車場,多在地底,密不透風。但公共屋邨則多在地面,空氣流通,長有二三百米,來回走四轉就是一公里,非常理想㗎!
曾智華

hd