曾智華 - 享受黃昏的英雄感|祿祿無窮

不認不認終須認,C朗正式宣佈「執尾會」,落戶沙特阿拉伯,加盟富豪球會艾納斯。

C朗愛威,人盡皆知。今次到沙特,若純粹踢「黃昏足球」,當然並非佢杯茶。故此,要設計一個非常輝煌原因,才落實公佈,以免俾人指純粹貪錢出賣黃昏生涯。

呢呢,今次佢就威威嘞。首先,簽約兩年,成全球最高身價運動員,收取十六億港元年薪。精算師計過,即月薪一億四千萬;日薪四百六十五萬;時薪十九萬三;每分鐘收三千二百三十元;每秒鐘收五十元,誇張到爆。

沙特富豪絕非傻佬,當然早早計過C朗的剩餘價值。首先帶起當地球賽事矚目性,收取更高轉播費及廣告費,而C朗亦要賣身做沙特足球代言人。

最重要使命——協助沙特阿拉伯、埃及聯同希臘攜手競逐二〇三〇年世界盃決賽周主辦權。因為——得世界盃得天下!

尤其,見到卡塔爾今屆取盡風光,整個國家因舉辦一次世界盃,頓成全球焦點。

不過,你知我知,C朗體能、技術及鬥志,皆在滑坡。更重要,佢愛威及唔衰得心態,會自己難以合群或願意為大利益作出妥協。單單見佢同「母會」曼聯反大面一劑,已見證脾氣難以控制。究竟去到沙特這個二流足球國,會踢出甚麼水準呢?非常難測。足球,並非個人表演,而是團隊精神的體現啊!
曾智華

hd