曾智華 - 零團費奸商有難|祿祿無窮

通關在即,旅遊業監管局總裁高調接受訪問,個個一睇:「嘩!好靚女喎!」

當然啦,佢靚,已不是今時今日的事,早在三十多年前加入警隊,已引起不少同袍「吞晒口水」!想追佢的,成條彌敦道咁長!

邊個咁巴閉?正是昔日電視女廚神方任莉莎女兒方安妮是也。

可能,佢愈靚,愈唔想俾同事覺得「太女人」,於是,工作上展露非常硬朗果斷作風。尤其二〇〇二年出任旺角行動組主任時,搞出震動全港的「殺雞大行動」,一年內拘捕超過六千名賣淫女子,結果,被冠「殺雞女督察」外號。這種「出位」作風在警隊之內,當然引起不少爭議,有支持,有反對。

不過,從那次開始,方安妮的鐵腕形象,傳遍香港。鐵腕好唔好?難講。結果,佢在仍當打時決定退休,時為二〇一〇年。

工作崗位變,但人的性格,不會變。兜兜轉轉前年開始出任旅監局總裁,撞正旅遊業因疫情而「靜如深海」,暫時難以大展拳腳。如今,終於等到通關了,立即高調表明旅監局進入「作戰狀態」,矛頭直指多年來被人詬病的「零團費劏客」文化。

自由社會行資本主義,若「水魚」明知被劏也為貪「零團費」而自動入籠,究竟,執法當局可以點做呢?這種多年來「行之有效」的鬥蠱惑文化,有因有果,且看方安妮點樣將其打破。


曾智華

hd