曾智華 - 天堂直播音樂會|祿祿無窮

天堂,真係愈來愈熱鬧,愈來愈開心!

前朝早上,收到老友葉潔馨「官方訊息」,公佈殿堂級作曲、編曲及指揮家顧嘉煇先生, 一月三日安詳離世,享年九十二歲。

性格使然,小弟並沒有甚麼悲傷感受,反之,腦內彈出昔日的一幅快樂景象,正是黃霑依起棚煙屎牙,大大攤開雙臂,在天堂門口迎接煇哥,然後兩人親切地擁抱。

上述情景,相信香港人經過多次,當然,我見得更多!天堂,本來已經有黃霑及倪匡,如今再加埋顧嘉煇,三大天才攜手,乜都創作得出啦。
  黃霑與顧嘉煇為香港人作出的貢獻,絕對不止在作出百計經典金曲咁簡單。更重要,是將社會、人生及人性的深奧哲理,用非常淺白方式表達,再灌成家傳戶曉的歌曲,深深影響了半個世紀香港人的價值觀!

順手拈來,大家可記得《狂潮》、《近代豪俠傳》、《家變》、《大亨》、《強人》、《奮鬥》、《抉擇》、《上海灘》、《親情》、《輪流轉》、《兩忘煙水裏》、《萬水千山縱橫》、《忘盡心中情》、《當年情》、《心債》⋯⋯到永恆的《獅子山下》?

大家有空,可再翻開以上作品的歌詞細味,自會發覺,兩位大師的成就,絕不單在歌唱世界咁簡單,尤其黃霑,根本是哲學大師!

羅文、張國榮及梅艷芳也在天堂,夠腳開大型演唱會了,會否直播到人間呢?
曾智華
更多文章