曾智華 - 毋須用腦悅目電影|祿祿無窮

入戲院睇戲,無非尋求娛樂。「娛樂」有好多定義,可以是大笑,可以是狂哭,可以是心痛,可以是甜蜜⋯⋯也可以是眼睛旅遊。

上晝上畫的一套《伙星行動.扭計特攻》,正是屬於眼睛遊世界及眼睛睇時裝表演一類,畫面靚到震,靚人靚衫靚景不絕,唔使用腦,也不悶。花二十五元坐在冇乜人的戲院(長者場),真係舒服又抵到無話可說。

此片一如N套荷里活片公式,有個包裝成慈善家的大魔頭(曉格蘭特),經營足以毁滅地球的軍火買賣。 於是,政府一個秘密部門千方百計找來超級(勁過占士邦)特工(積遜史達頓),帶領一隊各具絕技的精英,誓要將大魔頭的計劃摧毁。

以上橋段,冇一百都有幾十次出現在不同電影,故此,一開場已知超級特工必定完成任務,問題要經過幾多重危險矣。

《伙星行動》並無新意,故此途中你可出出入入去「殊殊」、買小食,甚至瞓着都冇問題,因劇情發展,全在你預料中!

此片令小弟有少少會心微笑,因諗起廿三年前風靡一時的經典愛情片《摘星奇緣》。當時,曉格蘭特靚靚仔仔儍儍戇戇純情浪漫,不知擄盡幾多女影迷的心。

如今扮演國際級恐怖大魔頭,變成眼神陰險,皮笑肉不笑,入木三分。究竟,過去廿三年,佢經歷過怎麼樣的人生呢?
曾智華

hd