曾智華 - 一處鄉村一處例|祿祿無窮

嘩!恭喜晒TVB,今年《萬千星輝頒獎典禮2022》,收視達二十九點四點,相當理想。

收視好,因吸引點多,尤其整古做怪的林敏驄,帶來久久未見的新鮮感。

電視,一切講收視。要谷收視,就要令觀眾有期待感,如何炮製出來?一半營造,一半靠幸運。點解無厘頭撞出咁吸引的《下流上車族》?今年能否再有呢種驚喜呢?難講。

TVB搞頒獎典禮,開宗明義自己同自己玩,難得玩出咁鬼熱鬧氣氛,「競爭」N個獎項,尤其視帝視后,真的一樣,都幾過癮。

有資深廣播人包拗頸:「有乜理由呢個攞乜乜,嗰個攞物物喎。連太后高層曾麗珍都攞『萬千光輝演藝大獎』,係咪自己頒畀自己㗎?」

小弟認為,此君認真唔化。做騷做騷,根本是騷,咁鬼認真做乜?

「碌Sir,你諗吓吖,若果商台叱咤樂壇頒獎禮作個獎畀俞琤,香港電台十大中文金曲頒獎禮又跟風,整個畀張文新,咁有冇公信力吖?」佢老哥仍然彈三彈四。

小弟冇佢咁好氣︰「老友,一處鄉村一處例,無記藝員成日喺頒獎禮中感謝高層,此乃機構文化,藝員願做,高層又受,觀眾話正,咁咪得囉。重有呀,頒獎,好多時都有背後意義㗎⋯⋯有的支持鼓勵,有的另有暗示,只得當局人明㗎咋!」

總之,一切以收視結果為目標是也!
曾智華

hd