曾智華 - 40蚊想請人?|祿祿無窮

最低工資凍結四年,政府終於拍板,五月一日開始,將法定工資最低水平,由現時三十七點五元加至四十元。

最低工資委員會主席王沛詩表示,今次調升跑贏通脹。

吓?好似唔係喎,凍結咗四年才加二點五元,即百分之六點七, 四年通脹點止呢個數呀,王小姐!

每次拗最低工資,資方代表的議員,尤其張宇人必定高調替資方頂住,N咁多理由話唔得唔得唔得!

真係時光飛逝,昔日佢頂到標牙血,硬食攻擊,今時今日,仍要升一倍,應該好「無奈」。

另一邊代表勞工的,當然被指「飛擒大咬」,最好「一年一檢」(有升冇跌,檢即係「升」也! )兼且,愈高愈好。勞方代表絕對唔會理資方有乜苦衷,因角色鮮明,各為其主。總之,目標就是打工仔要分享經濟成果!

兩邊都有其理由,故此埋枱一傾,永無寧日,自由搏擊。

其實,你知我知,如今比四十蚊時薪,真係有如肥老闆老友講:「哈哈,請鬼到人咩,連最基本的非技術性工作也冇人騷你啦!」

肥老闆旗下生意多多,又食肆又清潔有保安又運輸。

「碌Sir,簡簡單單請清潔工,冇時薪六十幾七十,唔使諗啦。夜更保安亦月薪萬八,司機個個二萬幾。四十蚊想請到個好員工?真係發夢冇咁早!」
曾智華

hd