曾智華 - 你自己照下鏡啦|祿祿無窮

上周某朝,攤在梳化揭《頭條日報》,揭到娛樂版,不期然自言自語:「嘩嘩,兩個變咗阿叔喎,重肥咗咁多O添!」

此話一出,旁邊的老婆大人即窒:「好心你啦,唔該照下鏡,你話佢兩個變阿叔,你都變咗阿伯啦。佢哋肥,彼此彼此啫!」

抵窒!快快步入洗手間照鏡再上磅,唉……話乜鬼人吖,自己咪更老更肥?

講邊個?正是準備攜手開演唱會的呂方及倫永亮(圖)。尤其呂方,如今真係成個「波」咁款。

時光倒流,返到上世紀八十年代,某日,我在辦公室埋頭工作,突然有個怕怕醜醜的年輕人走埋嚟,温文有禮講:「曾先生,你好,我叫倫永亮,剛剛由外國回港發展……」然後,送上一張CD:「請多多指教!」

當時,小弟與車淑梅主持電台王牌節目《晨光第一線》,朝朝幾十萬人次收聽, 若谷歌,只要有質素的,必定「一飛沖天去」!

好,一於細聽這首倫永亮自己作曲填詞的《愛在無限天方》。旋律與歌詞與當年香港主流(顧嘉煇、黎小田、黃霑、鄭國江…… )明顯有異,唱腔也是怪怪的。但有種感覺……佢可以自成一派,未必爆,但仍有空間出頭。

結果,歌的確引起樂壇注意,但冇大hit。人呢,也如是,欠缺一種星級魅力,點谷都無法上一線。不過,後來,佢一樣爆。不過,不是做歌星,而是作曲、編曲及搶手音樂會總監!
曾智華

hd