曾智華 - 幾大都試吓先|祿祿無窮

復常、復常,終於一切復常時間表有喇,正是最後的一項口罩令,特首也希望(在計劃中)今年內取消,大家可享受返正正常常的生活。

抗疫幾年,不但疫勞,真係搞到人都癲。事實,小弟有不少朋友因此染上情緒病。一方面日日戴口罩又隔離,又長期冇社交,出街又要防人,神神化化咁生活;有長者在護老院及公立醫院,唔准探,只有空擔心。活在這種負面心態中,搞出情緒病,是「正常」而非「不正常」。

被口罩折磨最嚴重者,一定是戶外工作者。尤其夏天,攝氏三十幾度高溫下,揮汗如雨,再焗住個口,滲汗情況更嚴重,一兩個鐘頭已乜都濕晒,呼吸也有困難,真的很討厭。

不過,萬事總有兩面睇。呢呢,我就有幾位男性朋友,過癮死!

呢幾個朋友皆做紀律部隊,平時,佢哋外型有晒規格,唔准呢樣唔准嗰樣,包括頭髮長度及顏色等,其中一項,為不准下巴留鬚!

其實,小弟都可以代表不少男性,總有個心願,放盡唔剃鬚一段日子,睇睇自己到時個「貓樣」會係點,型唔型。

只是,正常工作是極難做到,兼且,若家有惡妻,更必被喝罵:「為乜搞到成隻烏鴉嘴狗咁?」

所以,一般老友只能在放大假或退休後,試吓「不再剃鬚的日子」。但是,哈哈,一開始口罩令後,立即掂晒。幾個紀律部隊老友,一齊「玩留鬚」,放工後出來晚飯,除下口罩,開心死!
曾智華

hd