曾智華 - 生猛水魚蒸新鮮雞|祿祿無窮

咚咚撐、咚咚撐!兔年第一次見面,祝願《頭條日報》讀者身體健康,心境安寧,家庭幸福,打工的步步高陞,做生意的客似雲來!

新春期間,加上冇晒限聚令,當然盡情大吃大喝,見返兩年幾冇見的老友。

飲食業近期非常好景,稍稍出名及出品水準有保證的,全部訂爆,起碼過咗新十五才有機會搵到位。生意興隆,自然人人喜氣洋洋。

有鬥心似大廚,雖然生意滾滾,仍然不會/敢自滿,繼續經常性研發新菜式,吸引新客,留住舊客。例如綽號「光頭神探」的Andy,乃典型人辦。過年前,我book咗一圍菜與舊同學敘舊,請Andy寫菜單。傳來,咦⋯⋯過癮喎,其中一味名——生猛水魚蒸新鮮雞。

即問佢:「喂,得唔得㗎?兩種味撞埋,有冇良性化學作用?會否相沖㗎?」

「唔得點會炮製俾你歎呀,總之,一試便知龍與鳳。呢味菜,用兩件半生猛水魚,夠重身,保證裙邊滿是骨膠原;雞也是本地農場雞項,鮮味特濃,醃一醃再混合一蒸,上枱陣香味已引死人!」

「光頭神探」乃踏實之人,說話一就一、二就二,絕少講花話。

日子到, 十二大漢操去歎。一上枱,個個當然搶先打卡(見圖)。 

味道如何?一個字——正!若用三個字,就是——正到痹!

「碌Sir,呢味菜極花功夫,靚水魚及雞也難搵,所以只供應熟客,下次記得兩周前預訂 !」
曾智華

hd