曾智華 - 必須保護「交通文物」|祿祿無窮

利益申報,小弟與天星小輪及其幕後財團「零關係」,而我亦絕少專誠走去搭,只以事論事。

報章大字標題——天星小輪4月3日起加價,加幅五成半!

嘩嘩,好似好驚人。但一睇實質價錢,真係平到令人發笑。過海一程,由現時$2.6至$4.2增至$4至$6.5。

香港人最喜歡旅遊,走遍全世界大城市。請問有邊個國際城市由商業機構經營的公共交通,可以平成咁呢?

就算自己香港,坐隧道巴士或地鐵過海也要超過$10。在這個通脹飛升,燃油狂貴,人工保險維修樣樣加的情況下,竟然仲可以4蚊雞過海,講出嚟都難以置信。

其實,香港有兩種公共交通,真係平到癲,根本冇得做,因日日蝕本,正是電車與小輪。

N年前,政府為「o氹」大集團經營公共交通,特意「送」地皮做車廠。終於,你見到啦,早年的電車廠做咗超級商業廣場。昔日巴士廠亦起晒豪宅,之後邊有財團再積極「為公眾服務」吖,真係甩得就甩。

論效率。電車及小輪的確相當低,但佢哋存在,具特別意義,正如三藩市叮噹車(見圖),根本是一項標誌性文物,吸引無數遊客。

小弟認為,政府應主動津貼電車及小輪,因此乃「交通文物」,必須受到保護,唔准執笠!
曾智華
更多文章