曾智華 - 光閃閃中式牛柳|祿祿無窮

不少人經常半講笑、半認真指住小弟說:「你就好啦,成日出入名店,一時又話見一哥傳人,一時又去皇仁舊生會歎懷舊佛跳牆,成個富豪咁款噃?」

錯覺錯覺!事實係,我出外覓食次數,每周足有十三四次。

首先,早餐一定每天在地痞茶記,聽吓啲火爆的士大叔炒蝦拆蟹開《城市論壇》,又聽幾位肥師奶論盡娛樂圈八卦,娛樂性豐富之餘,也可以搵到極多靈感寫稿。佢哋話題朝朝新鮮,窒人到肉,令小弟樂此不疲。

每朝34元,齋食完多士奶茶炒蛋,然後打包沙嗲牛米,返家做午餐,天天如是。

晚餐呢,因認識為食鬼多,真的是走勻港九新界正斗食肆,有平有貴。當然,貴的出品較好,水準穩定,菜式較吸引,啱寫稿。

不過,一月總有三幾餐專誠去懷舊草根店歎街坊小菜,也覺滋味無窮。

今年開年,我就搵齊幾位兒時玩伴,走去紅磡漆咸道「金峰閣」,百分百「街坊裝」。此店昔日在高山劇場經營,後政府將原址改租畀社企,店主幸能在附近覓得舖位,繼續為熟客服務,主攻經濟小菜。是否非常出色?唔係。但價錢老實,老闆娘楊太親和力強,故此,絕大部份客人追住佢幫襯廿年過外。

此店並非味味正,但中式牛柳肯定可畀手指公!
曾智華
更多文章